ثقافة فيلم الرداء الابيض كان اشهر فيلم مصرى رومانسى فى الاتحاد السوفيتى (1 عدد المشاهدين)

[جدو سامى 🕊️ 𓁈]

هتتصدم صدمة كبيرة أوي لما تعرف إن أنجح فيلم في تاريخ السينما المصرية هو فيلم الرداء الأبيض لنجلاء فتحي وهحكيلك ده حصل إزاي ، في فترة الستينات والسبعينات كانت العلاقة بين مصر والإتحاد السوڤيتي كويسة جداً وكان فيه إتفاقيات شغل ما بينهم من ضمنها توزيع الأفلام المصرية في الإتحاد السوفيتي وده حصل مع أفلام زي صراع في الوادي والناصر صلاح الدين وأفلام تانية كتير حققت نجاح باهر هناك لكن في فترة السبعينيات كانت السينما المصرية في أشيك مراحلها ممثلين كلهم أوسم من بعض وممثلات كلهم ملكات جمال وأنتاح محترم وقصص رومانسية وكل ده خلي الأفلام تجذب الجمهور الأجنبي وفي سنة 1975 بينزل فيلم الرداء الأبيض لنجلاء فتحي وأحمد مظهر ومجدي وهبة ويوسف وهبي وبعد كام شهر بينزل في الإتحاد السوڤيتي وخد الصدمة بقا باع 61 مليون تذكرة آه و**** زي ما بقولك كده يعني تقريباً روسيا كلها شافت الفيلم لإنه بالنسبالهم كان زي تيتانك بالظبط ولو دخلت دلوقتي علي الإنترنت وكتبت إسم الفيلم بالروسي هتلاقي مواقع روسية كتير أوي منزلاه وحتي علي اليوتيوب موجود ولسه الناس في روسيا بتشوفه لحد النهاردة بسبب قصته الحلوة وجمال الممثلين عشان يحتل الرداء الأبيض المركز ال7 في قائمة أكثر الأفلام مبيعاً للتذاكر في تاريخ الإتحاد السوڤيتي لحد النهاردة ومع ذلك محدش في مصر يعرف!!
.