- وانت ما معاكش 800 جنيه يا أبو صلاح ؟
= لا طبعاً... هجيبهم منين ؟ ده أنا داخل جمعية بـ 30 جنيه في الشهر عشان أدبر الـ 300 اللي معايا !
- يا سلام ! ليه هي ماهيتك كام ؟
= الصافي حوالي 250 جنيه
- في اليوم ؟
= انت هتهرج ؟
- ما هو لو أقل من كده.. تبقى انت اللي بتهرج يا دكتور !
= يووووووه... انت باين عليك رايق ومشـ ـعشع الأنـ ـارخ !
- انت اللي صعبان عليا...
= صعبان عليك !
- زنقت روحك في الكيميا... وفضلت تدح في ماجستير.. وفي دكتوراه وفضلت تهرش نافوخك بيد 2 كب أ 4 ، ورجل 6 ف 18
= هههه... رجل 6 فيها 18 ؟
- وآخرتها 250 جنيه في الشهر يا مهـ ـرج ؟!
= ولا .. بلاش قلة حَيا.. مش عشان عازمني ع الغدا .
- انت عارف المهـ ـرج بياخد كام في الليلة الواحدة يا دكتور ؟
= المسألة مش مسألة كام فيه اعتبارات أهم من كام يا قفـ ـل !
- هاهاها ، أنا برضه اللي قفـ ـل !
= طبعا ، لإنك بتحاول تعرف سعر كل شئ ، لكن ما بتعرفش قيمة أي شئ
- وقيمة الشئ ، ملهاش سعر ؟ ملهاش تمن ؟ فيه قيمة من غير ثمن ؟
= القيمة لا تقدر بتمن ، تقدر تقولي تمن الحق كام ؟ أو تمن الخير كام ؟
- وهو من الحق أو من الخير ان واحد زيك ما يحتكمش على 800 جنيه يدخل بيهم ابنه المدرسة !
= معاك حق ، أنا فعلا مسرف !
- مسرف ؟؟!!
= المفروض اعمل حساب للظروف... المهم هتشوف لنا واسطة تعفينا من الإنشاءات ولا لأ ؟
- اتطمن يا أبو صلاح... الواد داخل المدرسة يعني داخل المدرسة .
= إزاي ؟
- زي كل العيال... هديك الـ 800 جنيه وتروح تدفع له المصاريف .
= وانت حيلتك 800 جنيه ؟
- هه ، عيب يا أبو صلاح ده احنا كسّيبة ومخلصين وبنطلع القرش من بذر العنب
= بذر العنب ؟
- آه ، أول ما نشخلل الشخاليل ونشرمق الشواشي ، هتسرسق البصاري ، وهنشفك دوغري .
= هتنشفني ؟
- أسبجك بالسُبَيّج يعني أحيّنك ، أقبّضك !
= إيه يا ابني الألفاظ دي ؟
- أعمل فيك إيه إذا كنت ما بتعرفش لغة ؟
= لغة ؟
- طبعا ، ما هي دي لغة العصر يا بتاع الكيميا يا مِترشّح ! "
_______________________
محمود عبد العزيز - يحيي الفخراني- فيلم الكيف 1985
