زوايا إبداعية

[Gharam]

زوايا إبداعية​

لما اتنين يقابلوا بعض… كل واحد فيهم بيشوف نفسه من زاوية جديدة​

في كل علاقة حقيقية، دايمًا بيكون في اتنين…​

مش واحد بيأثر والتاني بيتأثر، لا، الاتنين بيتغيّروا، كل واحد فيهم بيتعلم من التاني بطريقته.​

زاوية اللقاء:​

هو شاف فيها حاجة كانت ناقصاه، وهي لاقت فيه أمان مكنتش تعرف يعني إيه لحد ما شافته.​

اللقاء ماكانش صدفة، كان توقيت لازم يحصل علشان كل واحد يشوف نفسه بوضوح أكتر.​

زاوية القرب:​

القرب ماكانش لأنهم شبه بعض، بالعكس…​

كان لأن كل واحد فيهم لمس في التاني حاجة كان نفسه يفهمها في نفسه.​

زاوية الخلاف:​

لما اختلفوا، كل واحد شاف في التاني مرايته.​

شاف عيوبه، ردوده، خوفه، وكل اللي بيهرب منه.​

الخلاف عمره ما كان نهاية، ده اختبار بيكشف كل حاجة على حقيقتها.​

زاوية الفقد:​

لما بعدوا، ماحدش فيهم خسر التاني…​

كل واحد خسر النسخة اللي كان بيكونها وهو معاه،​

بس في المقابل… اكتشف هو مين من غيره.​

زاوية النضج:​

بعد كل ده، الاتنين طلعوا مختلفين.​

مكنوش زي أول مرة اتقابلوا فيها،​

بقوا أهدى، أصدق، وأوعى من قبل.​

الخلاصة:​

في ناس بتدخل حياتك مش علشان تكمل بيهم.. بتدخل علشان تعرف عن نفسك اللي عمرك ما كنت هتعرفه لوحدك. ​