فضفضة رأيكم

[koko1972]

من #الرسائل
أنا متجوزة من 8 سنين اتجوزنا عن حب وهو بصراحة إنسان حنيّن وبيحبني و فيه حرفيًا كل مواصفات الراجل المناسب بيحبني وبيهتم بيا هدايا وخروج كل اسبوع يوم الجمعة ومصيف في الصيف وطول الفترة دي عمره ما زعلني ولا ضايقني في أي حاجة ومكناش بننام غير وإحنا متراضيين يعني متفاهمين جدا مع بعض.
وفي موضوع الخلفو رٌحنا نكشف وكانت صد.مة كبيرة لينا إحنا الاتنين لأن جوزي طلع عقي.م لفينا على دكاترة وأماكن كتير وكل الفحوصات بتقول مفيش أمل حتى جربنا الطب الشعبي والتغذية وكل حاجه تخطر على بالكم وأنا كنت واقفة جنبه في كل حاجة وبحاول محسسوش اني زعلانة او مضايقة
وهو خيرني بين إني أفضل معاه أو ننفصل وكان دايما يقول أنا مش عايز أظلمك معايا وأنا قولتله **** يرزقنا مع بعض والأمل في **** ما بينقطعش وقادر على كل شيء
لحد من فترة قريبة عمل عملية والدكتور قال له اقفل الملف بقى وعيش حياتك طبعا قصده ان خلاص مفيش امل في موضوع الخلفه طبعا انا بصراحة زعلت جدا وتأثرت من كلام الدكتور لاننا كنا عايشين على امل بس الامل انقطع خلاص فبان عليا الزعل وتقريبا قطعت الكلام معاه وقولتله وديني عند ماما وبالفعل وداني بيت أهلي وقالي شايفك زعلانة على العموم
فكري بينك وبين نفسك براحتك أنا يا بنت الناس مش عايز أظلمك زي ما قولتك طبعا هو بيقولي الكلام ده وشايفاه متأثر اوي لحد العياط بس ماسك نفسه قدامي
من هنا استخرت **** واتكلمنا واتفقنا على الانفصال واتطلقنا وقولت يمكن ليا نصيب مع حد تاني واقدر اخلف وأبقى ام عشان الاقي سند لما اكبر
بعدها وأنا في العدة كلمني وقالي أنا هرجعك أنا عايزك ومش قادر أعيش من غيرك وإن شاء **** في كذا حد قالي على دكاترة تانيه وقالولي ان في أمل
بس أنا قولتله صعب إحنا انفصلنا وبدأت اتأقلم على حياتي بدونك ومش هقدر ارجع للهم ده تاني انا تعبت
وكمان أمي كانت رافضة رجوعي له رفض تام لأنها شايفة تعبي النفسي ومشوار الدكاترة والتعب اللي شوفته معاه خصوصًا إنها عارفة اني بحب الأطفال قوي
وعدى على طلاقنا 4 شهور وفجأة عرفت إنه اتجوز بصراحة زعلت قوي واتصدمت فعلا حسيت إن العِشرة هانت عليه وإنه نساني بالسرعة دي
طب وتضحياتي معاه خلال 8 سنين راحت فين؟
ما قدرش عشرتنا حسيت إنه خذلني وخيب أملي فيه
حتى أمي بتقولي ده الراجل اللي كنتِ مستعدة تضحّي عشانِه بالأمومة شوفيه اتجوز بسرعة إزاي
ونسيكي وهي الرجالة كده ملهمش عزيز بس هما اللي بيحبوا يعيشوا في دور الصعبانيات عشان عايزين كل حاجة
أنا مش ضد إنه يتجوز بس مش بالسرعة دي خصوصا ان هو السبب مش أنا بصراحة خاب ظني فيه ومجروحة منه اوي وحبيت ابعتلكم فضفضتي دي عشان كل واحده تخلي بالها وتفكر 100 مرة قبل ما تضحي بنفسها وتيجي على نفسها زيادة وفي الاخر تكتشف انه ميستاهلش تضحيتها وتزعل على اللي عملته في نفسها

 

[eglover_69]

يعني هي لو كانت اتجوزت قبل ما هو يتجوز كان هيبقي ده نفس رد فعلها ؟! اشك بصراحه هو اللي حارقها ان الراجل أتجوز قبل ما هي تتجوز

 

[koko1972]

يعني هي لو كانت اتجوزت قبل ما هو يتجوز كان هيبقي ده نفس رد فعلها ؟! اشك بصراحه هو اللي حارقها ان الراجل أتجوز قبل ما هي تتجوز

صح معاك حق