رياضة ٢٠٠٨ (1 عدد المشاهدين)

[koko1972]

في 2008 كوت ديفوار بقيادة دروجبا لما صعدت من المجموعات ووصلت دور ال8 قابلت منتخب غينيا وساعتها غينيا كانت بتقدم كورة وعندها لاعيبة حلوة بس دروجبا واصحابه مكنش عندهم رحمة لما قابلوهم كسبوهم 5/0 مع الرأفة وساعتها دورجبا جاب جول واحتفل الاحتفال الشهير اللي تحت السهم ده

الاحتفال ده مكنش استهزاء بغينيا قد مكان رسالة لمنتخب مصر اللي كسب انجولا واتعرف انه هيقابل الكسبان بين ساحل العاج وغينيا ووقتها صحفيين كتيرة اتكلموا عن الأحتفال ده ودروجبا نيته كانت كدة فعلاً

اللي حصل ان احمد حسن ليه فيديو في وثائقي 2008 بيحكي ان حسن شحاته قال للاعيبة المنتخب شايفين ببستهزأ ازاي ومش شايفكم بالبلدي

احمد حسن بيحكي بيقول واحنا نازلين نلاعبهم في قبل النهائي واحنا بنسلم عليهم تحسهم هيكسبونا هيكسبونا من كتر الثقة بس اللي حصل الماتش ده كان غريب جداً

احمد فتحي بيشوط كورة ضعيفة بتخبط في كذا مدافع وتغير اتجاها وتدخل جول ووقتها الناس علي القهوة في مصر ولحد الوقتي وحتي الاعيبة مش عارفين الكورة دي دخلت ازاي

الجول التاني عمرو زكي بيخبط بالدماغ من ركنية اتلعبتله والكورة بتيجي في العارضة بطريقة غريبة وبتدخل جول

الحضري في الماتش ده شال كوارث ويعتبر من افضل الماتشات في تاريخ الحضري ودروجبا ساعتها حرفياً اتعقد منه وشك ان فيه سحر وعض الشبكة من غيظه

الجول التالت عمرو زكي واخد المدافع بتاعهم من بعد نص الملعب عمال يرقص فيه شمال ويمين لحد ما وصل قبل منطقة الجزاء وشاط ودخلت

والهدف الرابع تريكة كان نسخة مصغرة من هدف النهائي قدام الكاميرون

وكسبت مصر اللي كان عندها جيل رجالة بمعني رجالة ووصلت النهائي والباقي اكيد انتو عارفينه