ثقافة حوت العنبر (1 عدد المشاهدين)

[koko1972]

في الصورة الرهيبة و الفظيعة الي قدامك، و الي التقطها المصور كيري ويلك في مياه دولة الدومينكان، هتلاقي كذا حوت عنبر و في وسطهم كائن ضعيف صغير إسمه الإنسان.
و علشان حيتان العنبر مخلوقات رهيبة و جميلة في نفس الوقت، خليني أقولك إنها كذلك مخلوقات مبهرة و مليانة ألغاز محيرة.
يعني مثلا حوت العنبر تمت تسميته كده بسبب مادة العنبر الي كان صيادين الحيتان بيتسخرجوها من أدمغتهم و بيستخدموها كزيت للإضاءة، مادة العنبر محدش يعرف تحديدا هي وظيفتها إيه بالنسبة للحوت، لكن بعض العلماء وضعوا نظرية إن الحوت بيستخدمها في الطفو، لكنها بالطبع مجرد نظرية مفتقدة للتجربة الحقيقية، فحتى الأن لسه وظيفة المادة دي لغز بالنسبة لينا.
و من هنا نيجي بقى لتفاصيل المخلوق المرعب ده، تقريبا بيقدر يعيش لحوالي 60 سنة، و بيقدر يغوص بدون ما يحتاج هواء لمدة 90 دقيقة كاملة، و كمان بيمتلك أكبر دماغ لمخلوق على الكوكب و وزن دماغه بس بيزيد عن 4 كيلو بحاجة بسيطة.
و فوق كل ده بيقدر يغوص في أعماق المحيط لحوالي 1000 متر حيث بيصطاد من الأعماق فريسته من أسماك القرش و الحبار العملاق و الي مشهور عنهم ان في حرب مشتعلة دايما ما بين حيتان العنبر و الحبارات العملاقة.
إناث حيتان العنبر بقى إجتماعية جدا، و دايما بتكون ضمن مجموعات متضمنة إناث أخرى و صغار حيتان، أما الذكور فهما دماغ بقى، مش بيحبوا الزحمة و الصداع و بيقضوا حياتهم في العزلة و التنقل بين المجموعات وقت التزاوج.
و في الأخر بعد كل المعلومات الي فاتت، كفاية تبص للصورة و تتأمل