رياضة الاجبار علي التشجيع (1 عدد المشاهدين)

[koko1972]

معلومة مهمه

طول عمر جمهور الكورة مالوش جنسية ولا قوميه

الكورة تذوق و فن و جمال و متعة
دول كتير أوروبية و عربية شجعت البرازيل
و أمثلة كتير أندية و منتخبات
جماهير انجولا و غانا شجعوا منتخب مصر بجنون

الناس بتحب الكورة الحلوة
فكرة أن كورتك عقيمة و وحشه
ده بيعمل تنافر و تباعد و محدش حتى هيتعاطف معاك
و طبيعى لو انا مثلا فى الملعب
و ادامى منتخب عربى و منتخب اخر حتى لو داخل اشجع فريق معين غصب عنى هميل و انحاز ل الكورة الحلوة و الذكاء الفنى .. دى معادلة مفيهاش كلام و لا جدال

اللى بيجتهد الناس بتحترمه
كان عيب انك تنزل تدافع ادام انجولا و بنين و تفقد شخصيتك و كورتك و تخاف طبعا

اكيد احنا اتريق على المنتخب السعودى لما اتلهف ٨ اهداف من المانيا .. لان دى الفطرة الناس تحب المتعه والأهداف
و ممكن اقولك خمسين مثال أن الكورة مفيهاش قومية و عربية و طيارة و عجله

منتخب مصر ايام حسن شحاته
هات كل لقطات احتفال الجهاز الفنى هتلاقى جمهور غانا والمنظمين بيرقصوا بجد و هما مش مصريين
كل افريقيا استمتعت مع المعلم و حفظوا التشكيل و عشقوا اسم مصر و منتخب مصر
لان الكورة اللى كنا بنقدمها و النتائج المقنعه عملت عامل السحر

فى ٢٠١٠ جماهير انجولا كانت بتشجع مصر بقوة
من غير قومية ولا عربية ولا اى كلام من خارج منهج الكورة
انت كنت تجذب أى حد بيحب الكورة

فى كأس القارات جنوب افريقيا كانت بتستعد ل كأس العالم فى تنظيم بطولة القارات
فا كانوا مقسمين جزء يشجع مصر و جزء يشجع البرازيل
الماتش بدأ و كله بقى يشجع مصر

وقتها كان بينا و بين الجزائر تصفيات ملتهبه جدا و مصانع الحداد فى الكورة
بعد عرض البرازيل الميديا هناك شجعت منتخب مصر وقالوا كلام فى منتهى الجمال

اجبرتهم على احترامك طبعا

الكورة ملهاش جنسية أو قوميه يا جماعه
ياما جماهير انديه شجعت المنافسين و هتفت ليهم لما قدموا كورة جميلة و العكس فرقتهم مقدمتش حاجة

تعالى اقولك على الكبيرة جماهير نابولى شجعوا مارادونا ادام منتخب بلدهم فى ايطاليا١٩٩٠ و كانت حادثة كبيرة على إثرها رحل مارادونا من ايطاليا

الناس كانت معجبين ب صلاح و مرموش أثناء البطولة و مستنين منهم كل لمسه

لكن أداء المنتخب المصرى للاسف ميجذبش أى حد ولا يخلى أى حد بيحب الكورة يشجعك أو يتعاطف معاك
دا احنا مصريين اصلا و كرهنا الكورة فى ماتشات المنتخب مع حسام حسن
نقول الصراحه .. عاوز واحد مغربى يشجعك عافية ليه
كورتك حلوة .. عاوز تكسب .بتهاجم بتجيب اهداف كتير
بتلعب كورة هجومية اللى الجميع بيحبها
ولا عملت أى حاجة خالص

نقول تانى
لو كنت قدمت كورة جامدة و حلوة وأداء قوى و شخصية
كنت هتجبر الجميع على احترامك و الإشادة بيك

انت عندك مثلا جماهير من افريقيا و الوطن العربى بيشجعوا بشكل قوى أندية داخل مصر زى الزمالك و الاسماعيلى عشان فلكلور كروى جميل
لان الكورة ملهاش جنسية طبعا

احنا مشكلتنا أن الذوق العام فيه مشكلة
أن فيه ناس فاكرة المكسب ب أى طريقة ده يجبر على الجميع على احترامك

لا طبعا .. الكورة دى رياضة ليها أسس و مفهوم
اولا العدالة و ال fair play و المنافسة الشريفة

بعد كدا قدم نفسك تفكيرك و مهارتك و موهبتك
لكن لو احنا عملنا تدشين لقاعدة اكسب بأى طريقة و كمان اللى بيكسب عاوز يجبر الجميع على احترامه
و الجميع عارف هو بيكسب ازاى فا مستحيل يحترموه

أظن هى دى المشكلة الرئيسية
إننا لازم نعيد مفهوم الرياضة و مفهوم المكسب. والخسارة
فى مصر لو فريق كسب بالحكام مثلا محدش هيحترمه و هتلاقيه مكروه و ممنوع يلعب امام جماهير باقى الانديه لانه مكروه .. فا ميستغربش
و لو فريق دخل المنافسة بدون عدالة أو مقومات الناس هتتعاطف معاه

هى دى فطرة البشر يا جماعه
بلاش نلعب فى الاعدادات بالعافية

محدش **** خلقة يحب الحاجة القبيحه
منتخب مصر نال تشجيع جميع الجماهير فى جميع أنحاء القارة الفترة من ٢٠٠٨ ل ٢٠١٠ تحديدا
لانه كان مقنع كان بيفوز دون أى تشكيك كان بيقدم كورة و شخصية هجومية و رغبه فى الفوز
.
#Primo