عوالم خفية حكاية طاهر بك المصرى (1 عدد المشاهدين)

[جدو سامى 🕊️ 𓁈]

عمرك سمعت عن المصري طاهر بك ، الراجل اللي إتدفن ورجع من الموت تاني ؟؟؟؟
طاهر بك المصري اتولد سنة 1897 في طنطا بمصر
كان من عيلة معروفة وسط الدواير الملكية في القاهرة ، بعد كده هاجر تركيا ومنها اليونان، وهناك درس الطب وتفوق فيه، لكن التفوق الحقيقي كان إنه درس نفسه، عرف قوته وضعفه، وخرج عن الطبيعي والمألوف، وعمل حاجات مش ممكن عقل يصدقها
وأشهر حاجة عملها طاهر بك ، لما حبس نفسه في قبر لمدة 28 يوم وسط اعتراض رجال الدين اللي إعترضوا على تجربة زي دي
وبعد فحص دقيق جدا بعد ما اتأكدوا إن مفيش هوا داخل للقبر، دخل حالة إغماء كاملة، لمس صدره وخبط على جبهته، واتنفس بقوة، وغمض عينيه ووقع كأنه ميت وجسمه اتجمد كأنه خشب، اتحط في النعش واتغطى بالرمال الحمرا ، والأطباء كانوا خايفين ومش مصدقين إنه ممكن يعيش
طلب من تلامذته وأصدقاءه محدش يفتح النعش إلا بعد 28 يوم ، وطلب منهم يحطوا فوق النعش وزن تقيل عشان يتأكدوا أنه مش هيخرج منه
بعد 28 يوم ، لما المساعدين فتحوا النعش، لقوا جسمه لونه رمادي ، افتكروا إن التجربة فشلت وطاهر مات، لكن بعد دقايق، بدأ يتنفس ببطء واتحركت جفونه ، وصحي وكأنه كان نايم .
28 يوم مقفول عليه نعش من غير هوا ولا أكل ولا شرب وقدر يعيش ودي كانت حاجة أغرب من الخيال

بعدها استعد لتجربة تانية لبس جلابية بيضا
وحط إيده على صدره وضغط على قفاه وجبهته وتنفس وقفل عينيه ودخل حالة إغماء للمرة التانية المساعدين عروه وحطوه على المنضدة وقاس الأطباء ضربات قلبه لاقوها 130 وده ضعف المعدل الطبيعي، حطوا حجر جرانيت وزنه 90 كيلوجرام على جسمه
وخبطوا على الجرانيت لحد ما انكسر نصه، وحطوه على ترابيزة فيها مسامير وإزاز
لكن الغريبة محصلوش أي جرح ولا نقطة دم، بعد كده وقفوه على رجليه وفتح عينيه ببطء كأنه خارج من حلم عميق وفاق تماما، الأطباء حاولوا يشكوا إنه خد مخدرات لكن كان طبيعي، وعملوا جروح في وشه ....وما خرجش دم
طاهر قال كل ده بسبب إرادته في مقاومة الألم وبتدريب ممكن أي حد يعمل زي اللي هو عمله.

طاهر بك اشتهر بعد الواقعة دي جدا لدرجة أن الملوك والأمراء طلبوه عشان يشوفوا قدراته الخارقة زي التحكم في الألم والتحكم في أوقات إغمائه واستيقاظه.
بعض الروايات قالت إنه كان بيقدر يتعرض للنار من غير ما يتأثر بالحرق وأنه عمل كده قدام الناس كذا مرة
الناس قالت إنه ساحر ومشعوذ ومخاوي جان
لكن هو نفسه قال إن القدرات دي مش سحر، دي قوانين طبيعية وروحانية مش أي حد يقدر يفهمها ويستوعبها

طاهر بك ظهر في عهد الملك فؤاد الأول و الناس كانت شايفاه ساحر وهو كان بيقول عن نفسه عنده قدرات روحانية، واكتب عنه في كتاب “أغرب حكايات السحر” لجون كاننج

أشتهر طاهر بك أنه ييساعد الناس يشوفوا من السحر والأعراض الغريبة وألف كتب كتيرة عن العلاج الروحاني والقدرات الروحانية ، واحد دلوقتي محدش عرف ازاي قدر يعيش في قبره 28 يوم !!!!!!! في واحدة من اغرب التجارب الروحانية في مصر