فضفضة الناس دلوقتى بقت قليلة ادب وذوق وفرحانين بده

[جدو سامى 🕊️ 𓁈]

ماتخليش حد يتهمك انك مريض نفسى سواء كان الحد ده مش دكتور بشرى او كان دكتور الا لو انت رحت له عايدته مثلا وطلبت تشخيص منه انما اذا عمل كده عشان خلاف فى الراى بينكم او عشان بينكم مشاحنات او حزازات او عشان انتم قرايب وبينكم خلاف على ميراث او عشان بينكم منافسة فى شغل او لاسباب حقد شخصى فماتسمحلوش يتهمك الاتهامات دى وقاطعه فورا عشان التهمة دى بقت موضة الايام دى خلاص عند اى خلاف فى الراى بيتم اتهامك سواء ف العالم الواقعى او الافتراضى من اى حد هب او دب بانك مريض نفسى او نرجسى او فصامى او مجنون عظمة الخ لان الناس بقت قليلة ادب وذوق ف الزمن ده مش بس من ورا الشاشات على الفيسبوك او التويتر او اليوتيوب لأ كمان ممكن تقابل ناس قليلة ادب وذوق من قرايبك او من زمايلك فى الشغل او جيرانك .. المسالة زادت عن حدها ومنتشرة حاليا بطريقة غريبة وبتتقال للجميع .. اى خلافات بين اتنين دلوقتى على الفيسبوك او اليوتيوب او الشغل او لاى سبب غير طبعا الشتيمة بالام والمعايرة بالوظيفة او البطالة او المؤهل او الاهل او مكان السكن او البيئة او الاصل كمان التهمة الجاهزة موجودة مجنون او كافر او مريض نفسى .. الناس دلوقتى بقت قليلة ادب وذوق ومبيراعوش اى نوع من الرفق واللين واللطف والادب والذوق ف التعامل.. وبالنسبة لهم ده قمة الرجولة والجدعنة والشطارة .. مش شايفينها عيبة.. وفوق كده بقوا بيعتبروا المؤدب او الراقى فى التعامل "غلبان" و "طيب" و"على الـله" الى اخره من المصطلحات اللى ظاهرها مش شتيمة بس معناها اهبل او عبيط او مش راجل او جبان