ثقافة عارفين الصورة دي يطلع منها كام مشهد (1 عدد المشاهدين)

[جدو سامى 🕊️ 𓁈]

عارفين الصورة دي يطلع منها كام مشهد، ورقة وقلم يا ست الكل..



مشهد ١
باب الجيران بيتفتح وبيطلع منه عمو جاركم شايل في ايده الطاولة وبيدق الباب عليكم الساعة ٧ المغرب عشان يقعد ويا بابا في البلكونة وصوت الزهر ويا صوت الضحك من القلب وانت داخل شايل في ايدك صنية عليها كوبايتين شاي وخايف تدلق منك، وتقعد متابع مين هايكسب وان كان في الحقيقة الكل كسبان ومافيش خسران.
مشهد ٢
اجازة الصيف الساعة ٤ العصر ريحة باسطة السلم اكل قرب يستوي وانت وولاد الجيران قسمتوا البلاط بالطباشير وبتلعبوا الأولى وبعدين كل واحد يبدأ يستعرض مجموعته المختارة من البلي وبعدها تبدأوا تبدولوا غطيان الحاجة الساقعة وأنت ناقصك الجادون عشان تفوز بيها.
مشهد ٣
الساعة ٩ بليل يوم الخميس الأبواب كلها مفتوحة وصوت زغاريط وفرع نور بيلالي جنب بوكية ورد كبير وصندوقين حاجة ساقعة، اللي داخل مايعرفش الفرح في أي بيت وكأن كل البيوت بقت بيت واحد والفرح فيها سارح.
مشهد ٤
الساعة ٨ بليل في ليلة من ليالي ديسمبر، ريحة السلم شتا شديد، وريحة البيوت ونس، تسمع همس جاي من ورا كل باب بيحكي ان اللمة كاملة وان العيلة هي الأساس.
الحقيقة ان المشاهد كتير لو حاولنا نوصفها من هانبطل حكي، لكن اللي بيجمعها انها اتحولت عبر الزمن من مشاهد حقيقية بتنبض حياة، لمشاهد للقطات ثابتة في ذاكرة بتعافر متبتة فيها عشان تفضل فاكرة إنها عاشت أيام طيبة وسط ناس حنينة، ان كان النهاردة صعب فاحنا كنا محظوظين بنصيب من الفرح، وتفضل كلمة لو على لسان معظمنا بيتمنى تعود اللحظة وتدوم العُمر كله.
منقوول