تجربة الشاى باللبن الصح واللذيذ (1 عدد المشاهدين)

[جدو سامى 🕊️ 𓁈]

اتعودنا واحنا صغيرين على الشاى باللبن وكان لذيذ جدا ومنتهى الطعامة على عكس دلوقتى

يمكن عشان كان الشاى شاى التموين .. واللبن السايب اللى بيمشى بيه البياع كان لذيذ فى طعمه وريحته وقشطته ..

دلوقتى مفيش شاى تموين من بتاع زمان . ولا فيه اللبن السايب اللى طعمه وريحته جميلة وقشطته تمام ..

طيب ايه الحل وايه السبب ؟

الحل متستعملش شاى ليبتون لانه حاد شويتين ويمكن عليه صبغة كمان عشان يبقى غامق كده.. طعمه مزز وجازع جدا ومينفعش يتعمل منه شاى بلبن
استعمل شاى العروسة هو الالذ والاطعم مع سكر زيادة وهو الاقرب لطعم شاى التموين بتاع زمان

طيب واللبن ؟

استعمل لبن جهينة .. اى نوع تانى سواء معلب او سايب مش هتلاقيه مناسب .. الا اذا كان لبن فلاحى اصيل وانت دقته قبل كده كتير وعجبك طعمه وريحته

يبقى المكونات كيس شاى العروسة مع نصف كوباية مياه بتغلى
وعدد ملاعق صغيرة سكر زى ما تحب على ذوقك وحبذا لو سكر قصب اللى ريحته عسل وخشن وغامق حبة ده بس البنجر برضه ينفع
ولبن جهينة

الطريقة

بعدما تسيب كيس شاى العروسة فى نصف الكوباية المية المغلية خمس دقايق مثلا شيل الكيس من الكوباية وصب وكمل الكوباية بلبن جهينة
وممكن تكون مسخن اللبن لوحده عشان مايبردش الشاى .. بس كده وتشرب احلى كوباية شاى بلبن زى بتاعة الطفولة والمدرسة