فضفضة لو انت فى حياتك حد سام جدا (1 عدد المشاهدين)

[جدو سامى 🕊️ 𓁈]

لو انت في حياتك حد سام جداً، مش فارق معاه إنك في أزمة ومش هينجدك لو استنجدت بيه، بس بيعلق على تصرفاتك ويحاسبك ويدي لنفسه الحق إنه يكون قاضي وجلاد على أفكارك، ولو عملت حاجة لمستقبلك كويسة يتريق ويسخف ويحقر من أي حاجة كويسة بتعملها، نرجسي جداً، قاسي جداً، بيكسر نفسك في أي فرصة، مهما أذاك وجرحك مش بيحس إنه عمل حاجة وانك مزودها وبتتلكك، انت في نظره مش موجود وملكش أي حقوق، ولو عاملته بنفس معاملته يعيش دور المصدوم والمظلوم، لو واجهته يقلب عليك الترابيزة عشان يطلعك انت اللي غلطان ويحسسك بمشاعر سيئة تجاه نفسك، ألاعيبه النفسية مبتنتهيش، وكمان أذاه مش بينتهي، ومش حاسس تجاهك بأي تعاطف ولا ذنب من تصرفاته وكلامه.
لو الإنسان ده حد من اصحابك او من جيرانك او معارفك هتقطع علاقتك بيه أو على الأقل تتجنبه وخلاص لو مضطر تتعامل معاه، إنما لو كان حد من أفراد أسرتك، مراتك او جوزك، أبوك أو أمك، أختك أو أخوك، لو حتى قدرت تهرب وتنجو من العلاقة دي، هل هتقدر تتعافى منه مهما مرت السنين؟!!