رياضة مين معايا (1 عدد المشاهدين)

[koko1972]

قابلت تعليقات عباره عن :
#شكرا حسام حسن ، و #منتخبنا فاق التوقع وخرج من دور مكناش نحلم بيه ، وكلام منبطح من هذا القبيل !
لما تشوف مسيرة المنتخب في البطوله كانت عباره عن دجل وحظ لدرجة أني توقعت أننا هناخد البطولة من كتر ما هي ماشيه معانا جمايل

• من اول مباراه زيمبابوي اللي كنا متأخرين لآخر ربع ساعه وفوزنا بكوره ضاله ومهاره فرديه من صلاح
• مرورا بمباراة جنوب افريقيا وضربة الجزاء العبثيه اللي خدناها وبعدين لعبنا ١٠ تحت الكوره طول المباراه قصاد جنوب افريقيا المتواضع فنيا ، ومكسبنا خلانا في الصدارة بجملة الحظ استفاده من نتيجة انجولا وزيمبابوي !
• وبعدين مباراه حوكشه بلا أي قيمة فنيه قصاد انجولا !
• في دور ال ١٦ قابلنا تالت مجموعه ومنتخب بنين المتواضع اللي مكسبش اي مباراة طول تاريخه في البطولة وروحنا معاها اكسترا تايم (انت متخيل) !
• ثم مباراه كوتيفوار في ربع النهائي واللي استغلينا فيها خطأ مدافع في الدقيقه ٣ مع سوء تمركز بحارس المرمي في كرة ثابته كانت كفيله لتغيير مجري المباراه !
• حتي الهدف الملعب الوحيد من ربيعه لعاشور لصلاح كان كلها نتيجة تحول هجومي وتمريرات كاسره للخطوط !
• وبعدين مباراه السنغال اللي ظهرنا فيها عاجزين تماما لأن ببساطه منتخب السنغال مغلطش غلطات كوتيفوار الساذجه !
ف ايه المنتج اللي اتقدم في البطوله ؟
وهل الوصول لنص النهائي معيار نجاح ؟
ولا مسار البطولة اللي خدمنا ؟
يعني بمجرد ما قابلنا منتخب قوي ومنظم ومش بيغلط اتكشفت عورتنا !
لو عاوز تشوف نظرة العالم ليك هتلاقي التقرير ده اللي بيتكلم أن منتخب مصر مشاطش غير كوره واحده في الدقيقه ٩٥ علي المرمي !
وكان كل تبريرتنا للهزيمة السفر والبنسيون وان البطولة موجهه وخايفين من مصر !!
منين بتشتكي من ضغط المباريات ومنين عاوز توصل المباراه ل ١٢٠ دقيقه وركلات ترجيح ؟
وأعتقد وصول المغرب امبارح لركلات ترجيح بعد ١٢٠ بينفي كل نظريات المؤامره

ما لو كل فريق اقل اتغلب من كل فريق اكبر يبقي فين متعة الكوره ف كده ؟
وهل لما كسبنا ٢٠٠٦,٢٠٠٨,٢٠١٠ كنا اقوي المنتخبات ؟
مصر عبر تاريخها الرياضي ما ابتعدتش عن منصة التتويج اكتر من ١٢ سنه ، احنا لو كسبنا النسخه الجايه هيبقي اخر تتويج لينا من ١٨ سنه !
ف الناس اللي ملهاش ف الكوره وشايفه أن وصولنا لنص النهائي إنجاز ، محتاجين يعرفوا تفاصيل اكثر زي تفاصيل مشوارنا السهل ف البطوله وأننا من اقل فرق المقدمه في القاره .
عندنا الفرق بتمنع لعيبتها من الاحتراف وفساد منظومه رياضيه هو اللي وصلنا من منتخب ترتيبه التاسع عالميا لمنتخب فاشل بيلعب تحت الكوره ومش بيشوط شوطه علي مرمي المنافسين!!