رياضة مصر والسنغال.. خروج السادة الأفاضل (1 عدد المشاهدين)

[koko1972]

مصر والسنغال.. خروج السادة الأفاضل من كأس الأمم الأفريقية بعد ما حسام حسن لاعب السنغال بخطة "بكاسة دي بابل"..
1- مباراة كرة قدم من طرف واحد؛ السنغال بيلعبوا كورة، وبيحاولوا يهاجموا، ويشكلوا أي خطورة، يخترقوا، يلعبوا عرضيات، يسددوا.. في المقابل منتخب مصر مرصوص زي الطوب مفيش أي إبداع ولا خطة ولا حركة ولا أي حاجة.. كأن قُلَل بتلعب..
2- لما نقول إحنا شغالين من غير مدير فني فده مش افترا ولا كراهية، لكن الحقيقة إننا فعلاً مفيش معانا مدير فني بيفهم تكتيك ولا خطة ولا كورة بخمستاشر قرش..
3- الغريب إني حسيت الوطنية قلت سيكا لما الكاميرات جات على حسام حسن وقت عزف السلام الجمهوري ومكانش بيعيط، كان فال وحش أوي، قلبك قوي على مصر يا حسام؟ وإبراهيم كان مختفي وقتها، أومال مين اللي مش هياكل ولا يشرب علشان نكسب؟!
4- المُهم إننا عاملين تدريبات ومؤتمرات صحفية وتصريحات وفيديوهات وبتاع، وتلاقي حسام حسن عامل إنه عامل خطة، أتاريها نفس خطة (الجوهري) بس مش بتاع المنتخب، لأ الجوهري بتاع فيلم السادة الأفاضل وهما رايحين يسرقوا مكتب البوستة.. لما قال لهم إنتوا مشوفتوش "بكاسة دي بابل"؟
5- كل اعتماد مديرنا الفني كابتن طه الدسوقي إن منتخب السنغال على وش معاش ومش هيقدر يجري التسعين دقيقة، فاتفاجئ إنهم بيجروا عادي، زي ما في الفيلم اتفاجئ إن حارس المكان شاب مش راجل عجوز.. وكان طبيعي تكون نهاية فيلم الفيلم زي نهاية فيلم البطولة.. للأسف الشديد فشل شديد.. لأننا داخلين بطولة كورة بس مش علشان نلعب كورة؛ داخلين نلعب بانتومايم بإشارات وحركات بهلوانية طول التسعين دقيقة على الخط..
6- قبل الماتش كنت شوفت إحصائية بالنسب المئوية المُحتملة لفرصة فوز كل منتخب بالبطولة من منتخبات دور نصف النهائي.. مصر كانت الرابع والأخير للأسف بأقل نسبة فيهم.. والحقيقة إن مصر ملعبتش كورة حتى لو كنا قدرنا "نكلفت" كوت ديفوار، بس شغل الكلفتة والحنجلة والحظ ده ينفع مرَّة واتنين وممكن آه يستمر كتير لحد ما تكسب البطولة، بس الطبيعي إنه ميستمرش لأن هو الشذوذ مش القاعدة..
7- خطة حسام حسن المفهومة إن إحنا نخليهم يزهقوا لحد ما يكرهوا الكورة والماتشات والبطولة، فيسيبونا نكسبهم علشان يخلصوا من القرف ده..
8- التكتيك بتاع الكابتن إننا كنا في انتظار إنهم يعملوا خطأ دفاعي عبيط نستغله ونخطف.. بس محصلش فمعرفناش نعمل حاجة علشان معندناش خطة كويرة؛ عندنا خطة نشالين..
9- إمام عاشور ما شاء ****، بيلعب مدافع، وليبرو، وظهير أيمن أيسر، وديفندر، وصانع ألعاب، وراس حربة، وجناح يمين، وجناح شمال.. كل ده في نفس الماتش وفي نفس الوقت.. بينما فيه ناس تانية ضيوف شرف في الملعب زي ياسر إبراهيم ومروان عطية ومحمد هاني وعمر مرموش..
10- نفسي ومنى عيني قبل ما أموت أشوف في مصر ملعب كورة زي اللي اتفرجنا عليه النهارده.. بالمناسبة ستاد القاهرة هيتقفل 7 سنين علشان يغيروا له البامبرز..
11- **** نجاني النهارده من تعليق علي محمد علي وشوفت الماتش على القناة الجزائرية.. والحقيقة المعلق كان ممتاز وكان لا يقل انتماءً لمصر من علي محمد علي خالص و****.. الفرق بينهم إن المُعلق الجزائري صوته كويس وأسلوبه معقول جدًا ومقبول عكس ملك السرسعة بتاعنا..
12- المُشكلة الوحيدة للمُعلق الجزائري إنه عليه عفريت اسمه "ياللا يا شناوي".. أي كورة عاوز الشناوي يطلع عليها حتى لو تمريرة في نُص الملعب.. اللي هو اللاعيبة على دايرة السنتر بيحاولوا ع الكورة، فجأة تلاقي صاحبنا بيقول "ياللا يا شناوي".. الكورة كورنر لينا (مع إننا معرفناش نجيب فيهم كورنر حتى) فتلاقيه بيقول "ياللا يا شناوي".. هو كان المفروض الشناوي يعمل إيه بالزبط يا أخينا؟ المشكلة إنه في المرَّة اللي مقالش فيها "ياللا يا شناوي" ساديو ماني شاط كورة ملهاش أي لزوم ولا قوة ولا توجيه ولا معنى، راحت لابسة جول!
13- كان نفسي أشوف خبير في لغة الجسد يفهمني هي إشارات حسام حسن للاعيبة وهو عمال يتنطط ع الخط طول التسعين دقيقة معناها الكروي إيه، طالما كل خبراء الكورة مش عارفين يفسروها ولا يفهموها سواء هُما أو لاعيبة المُنتخب، أو أي مخلوق له علاقة بالكورة..
14- مُدرب السنغال في خناقة الشوط الأول كان متضايق جدًا من أسلوب التقفيل بتاع مصر، واللي يخلي أي فرقة عاوزة تلعب كورة مُمكن تطفش وتسيب الملعب، راح سأل حسام حسن وقال له: إنت جاي تكسب واللا جاي تهرج؟ طبعًا كلنا عارفين إجابة حسام: أنا جاي أهرَّج..
15- تبديلات المدير الفني الجهبذ شاذة وعجيبة.. متفهمش تريزيجيه مكان أحمد فتوح نازل يعمل إيه؟ ولا تعرف إمام عاشور يخرج إزاي مهما كان مين اللي نازل مكانه.. تخيل مدرب معاه محمد صلاح ومش عارف يعمل إيه بيه ولا يستغله إزاي في ماتش أغبر زي ده؟!
16- الغريب طبعًا إنه نزل مصطفى محمد وصلاح محسن بعد خراب مالطة، ومفيش خطة ولا تكتيك ولا أي طريقة لعب تساعدهم وتخليهم يوصلوا للتهديف.. أهو بيرمي أي حاجة وخلاص من شباك العربية قال يعني كده شغال وممكن يوصل..
17- عمومًا أي كلام في الكورة أصبح غير مُجدي، ومفيش فايدة بعد ما خسرنا البطولة بشكل مُخزي، لا لعبنا كورة، ولا قدمنا روح، ولا أي حاجة.. فرقة رايحة عاوزة تضبش في أي حاجة، وبكره تلاقي التصريحات اللي بتغسل الذمة وتبرر الفشل إننا عملنا فريق جديد وروح جديدة والمدرب الوطني والبطيخ الوطني.. ومش هناكل بطيخ لحد ما نروح كاس العالم..
18- مفيش حساب هيحصل لأي فاشل علشان محدش هيعترف بالفشل أصلًا للأسف.. وللأسف الشديد الكُل مستفيد في المكسب والخسارة، ما عدا الجمهور هو الوحيد اللي مبيستفيدش حاجة إلا حرقة الدم..
19- الناس اللي كانوا بيقولوا حضور الفنانين للماتش هيجيبنا الأرض علشان وشهم نحس.. أهم الفنانين محضروش.. وهاني أبو ريدة كان وش الخير الحقيقة، هو فنان كبير برضو في التمثيل، وبيعرف يمثل أحسن من أي حد؛ علشان كده سيادة الوزير أشرف صبحي هيستقبل الفرقة بالطبلة والزمارة كأنهم راجعين بخزنة مكتب البوستة بعد نجاح خطة "بكاسة دي بابل"..
20- اللي بيحب مصر يحاول يجيب لها جهاز فني محترم يعمل شكل كويس في كاس العالم، إحنا رايحين نلعب كورة مش رايحين نخلي العالم يكره الكورة واليوم اللي اتعملت فيه الكورة!