ثقافة اهلا بك فى معسكر آكلى لحوم البشر (1 عدد المشاهدين)

[جدو سامى 🕊️ 𓁈]

«أهلاً بيك في معسكر آكل لحوم البشر.. أنا الوحيد اللي عشت!»

دي الجملة المرعبة اللي قالها الطيار "مارتن هارتويل" لفريق الإنقاذ لما وصلوا له أخيراً وسط جبال التلج بعد شهر كامل من الاختفاء!

قصة حقيقية، من أغرب وأقسى قصص البقاء على قيد الحياة في التاريخ، حصلت في شتاء سنة 1972 في أقصى شمال كندا.

تعالى أقولك:

الرحلة الإنسانية اللي تحولت لكابوس:

في 8 نوفمبر 1972، طيارة صغيرة من نوع (Beechcraft 18) طلعت في رحلة إسعافية طارئة من منطقة معزولة جداً اسمها "كامبريدج باي".

الطيارة كان سايقها طيار ألماني الأصل عنده 47 سنة اسمه "مارتن هارتويل"، ومعه 3 ركاب:

. جودي هيل (27 سنة): ممرضة بريطانية، كانت بترافق المرضى.

. نيمي (25 سنة): سيدة حامل في شهرها السابع وتعبانة جداً، وكانوا عايزين يلحقوها في المستشفى.

. ديفيد كوتوك (14 سنة): مراهق من السكان الأصليين، مصاب بالتهاب حاد في الزائدة الدودية وبيموت من الوجع.

الهدف كان يوصلوا لمدينة "يلونايف" عشان الرعاية الطبية. الجو كان مرعب.. تلج وضباب وعواصف، و"مارتن" مكنش عنده خبرة كافية في الطيران الليلي وسط الجو ده، ولا كان مؤهل للطيران بالاعتماد الكامل على الأجهزة بدون رؤية بصرية!

اللحظة الحاسمة والسقوط:

أثناء الرحلة، الإشارات اللاسلكية من برج التوجيه (منارة بحيرة كونتو) كانت ضعيفة جداً وما لقطتش، وبدأت البوصلة تخرف.

الطيار تاه تماماً ونزل لمستوى منخفض، وبالغلط وهو بيولع نور الكابينة، ضوء النور عماه ومبقاش شايف برة.. وفي ثواني، الطيارة خبطت في جبل تلج وسط الغابات المعزولة!

الناجون من الكارثة:

لما الطيار فاق من الغيبوبة، لقى جثة الممرضة "جودي" فوقه (ماتت فوراً من الاصطدام). والطيار نفسه رجله الاتنين اتكسروا تماماً ومبقاش قادر يتحرك خطوة.

أما الست الحامل "نيمي"، فضهرها اتكسر وماتت هي وجنينها بعد ساعات قليلة من الحادثة.

المعجزة الوحيدة كان الولد الصغير "ديفيد" (14 سنة).. طلع من الحادثة سليم تقريباً بشوية كدمات، رغم إنه كان تعبان جداً بالزائدة!

بطل الحكاية الحقيقي (ديفيد):

الولد ده عمره ما ساب قريته الصغيرة ولا يعرف حاجة عن غابات التلج، لكنه أظهر شجاعة كبيرة!

تحت توجيهات الطيار المشلول، "ديفيد" بنى مأوى من شجر الصنوبر والمشمع، وولع نار تدفيهم في درجة حرارة وصلت لـ 40 تحت الصفر!

المؤن اللي كانت معاهم في الطيارة (علب بولوبيف، أكل مجفف، شوية زبيب ورز) خلصت كلها في أول 20 يوم.

من كتر الجوع، بدأوا ياكلوا شجر، وطحالب.

المأساة الكبرى وموت ديفيد:

في أواخر نوفمبر، "ديفيد" أخد أدوات صيد وخرج وسط العواصف يدور على بحيرة يصطاد منها سمك، تاه وغاب 51 ساعة ورجع وهو بيموت من الجوع والتعب.

في 1 ديسمبر 1972، مات "ديفيد" من سوء التغذية والإحباط الشديد.. وزنه وقتها كان وصل لـ 34 كيلو بس (خسر نص وزنه)!

التقرير الطبي بعد كده أكد إن "ديفيد" كان ممكن يعيش أكتر، بس هو استهلك كل طاقته وصحته في خدمة الطيار المشلول، ومات بسبب طيبة قلبه!

القرار المرعب:

بتقول التحقيقات إن الطيار "مارتن" لقى نفسه وحيد، مشلول، وسط التلج ومفيش أي أكل، وعارف إن الإنقاذ مش هيوصل..

في لحظة يأس، كتب رسالة وداع لابنه في ألمانيا وقال له "سامحني أنا بموت".

لكن غريزة البقاء كانت أقوى! عشان يعيش، اضطر "مارتن" إنه يتغذى على جثة الممرضة "جودي" اللي كانت محفوظة في التلج!

استخدم بَلطة كانت معاه عشان يقطع أجزاء منها.. وقعد على الحال ده حوالي 10 أيام! (التحقيقات أكدت إنه ملمسش جثة "ديفيد" ولا جثة "نيمي").

الإنقاذ بعد فوات الأوان:

عملية البحث دي كانت الأغلى في تاريخ كندا وقتها وكلفت حوالي 2 مليون دولار كندي، والجيش وقف البحث بعد 19 يوم! لكن حبيبة الطيار "سوزان" صممت إنها مش هتستسلم وضغطت عشان يرجعوا يدوروا تاني بعد ما لقطوا إشارات لاسلكية غامضة.

في يوم 9 ديسمبر (بعد 31 يوم من الحادثة)، طيارة لقطت الإشارة ونزلوا باراشوتات.. وهناك صَدَمِتْهُم المفاجأة المرعبة وجثة "جودي" اللي متدمرة جمب الخيمة!

إيه اللي حصل بعد كده؟

الطيار "مارتن هارتويل" اتعالج وعاش، وسحبوا منه رخصته لفترة لأن التحقيق أثبت إنه مكنش مؤهل للرحلة دي في الجو ده، والشركة كمان اتعاقبت.

المفارقة إنه رجع طار تاني، وعمل حادثة تانية سنة 1987 وتاه في الغابة يومين برضه بس طلع سليم! وعاش مع "سوزان" لحد ما مات سنة 2013 عن عمر 88 سنة.

كندا خلدت اسم البطل الصغير "ديفيد كوتوك" ومنحته وسام الصليب للخدمات الجليلة بعد وفاته، لأنه لولا تضحيته، مكنش الطيار عاش يوم واحد.

الممرضة "جودي" اتعمل باسمها صندوق خيري لتدريب الممرضات، و"نيمي" سابت **** عندها سنتين ربتها جدتها.