فضفضة الكاتب والفنان والمثقف مش بهلوان فى سيرك بيراضى الناس على حساب مبادئه (1 عدد المشاهدين)

[جدو سامى 🕊️ 𓁈]

الكاتب والفنان والمثقف مش بهلوان فى سيرك بيراضى الناس على حساب مبادئه
الكاتب والفنان والمثقف والمبدع عموما والمتنور والعالم مش بلياتشو فى سيرك ولا قرد بيتنطط لارضاء واسعاد العوام او غير العوام

فاللى فهمكم انه بلياتشو غلطان وضللكم او انتم ضللتم نفسكم .. ولا هو موظف بيبدع عشان يقبض فلوس او ياخد مقابل من اى نوع من الناس.. برضه اللى فهمكم انه تحت امر الناس او موظف عندهم يبقى غلطان وضللكم

الكاتب والفنان والمثقف والمبدع والمتنور والعالم بيعبر عن نفسه وعن اللى شبهه وبس
فاللى عاجبه ده اهلا وسهلا واللى مش عاجبه ده يقدر يدور ويلاقى كتاب وفنانين ومثقفين ومبدعين ومتنورين وعلماء بيدعموا افكاره نفاقا او عن قناعة .. انما انك تيجى للكاتب او المبدع او الفنان او المتنور الخ وتقوله لازم تغير مبادئك وكتاباتك وافكارك عشان تراضى الناس .. الكاتب والمبدع والفنان والمتنور والعالم الصح هو المتسق مع مبادئه واللى بيبدع بما يوافق افكاره وبس

اعجاب او رضا او سخط الناس عليه او منه ده مسالة مش فى اعتبار اى مبدع حقيقى
المبدع الحقيقى بيعبر عن نفسه ولو فيه حد شبهه وعجبه ابداعه اهلا وسهلا

بس هو بالاساس بيبدع لنفسه وبيعبر عن نفسه وبس رضى من رضى وسخط من سخط
والتصرف الحضارى الوحيد انك تسيبه يبدع زى ما هو عايز ويعبر زى ما هو عايز حتى لو مش عاجبك او بيضايقك كلامه

طالما ما شتمكش او شتم حد بشكل شخصى وطالما ما حرضش على قتل او ارهاب او سفك دماء

اتمنى اكون وفيت بالموضوع واتمنى محدش ييجى بعد كده يقولى احذف قصتك او بدلها او غيرها او غير فى مقالك او راضى الناس .. لا انا ولا غيرى بلياتشوهات فى سيرك ولا قرود بتتنطط لحد .. واللى حابب يكون بلياتشو برضه دى حريته الشخصية ماليش دعوة بيها ولا حد له دعوة بيه .. انما عن نفسى هعبر دايما عن افكارى واللى يعجبنى .. مش هاراضى حد ولا غرضى استفز حد برضه.. اللى يستفز هو حر ده شأنه واللى يتبسط هو حر .. انما تقوله هات قصة غير دى او بدلها او هات ابداع غير ده او علم غير ده او فن غير ده او بدله مش هيحصل لانه بيعبر عن مبادئه مش مبادئك.. دور وهتلاقى اللى يعبر عن مبادئك

المبدع الحقيقى بيعبر عن نفسه مش بيراضى حد.. انت شايف راى تانى غير كده انت حر.. بس ده رايى وده اللى ماشى وهمشى ومشيت عليه دايما

المبدع الحقيقى بيعتبر مجرد انك عايز تحذف قصته او عايزه يحذف قصته او ابداعه او يغيرها، جريمة كبيرة وتعدى كبير واكبر جريمة فى حق المبدع انك تكتم صوته او انك عايزه يخون مبادئه ويغير فيها عشان يراضيك او يراضى غيرك.. واكبر معروف تعمله فى المبدع انك تحترم حريته وحقه فى التعبير بحرية عن مبادئه وافكاره وابداعاته حتى لو كانت بتغضبك وبتضايقك ومش متفقة مع افكارك ومبادئك

© نصيحة - الكاتب والفنان والمثقف مش بهلوان فى سيرك بيراضى الناس على حساب مبادئه